Kalzig tud e bed ar brezhoneg a vez o stourm e luskadoù ekologel pe sokial. Peseurt liammoù a zo etre ar brezhoneg hag ar stourmoù-se? Setu tem an daol-grenn a vo aozet d’an 20 a viz Mae e Langoned da vare Gouel broadel ar brezhoneg 2017.

Stourmerien Dour & stêrioù Breizh, a-enep al lezenn El-Khomri, feministed, tud a-enep ar mengleuzioù, an nukleel pe an OGK, setu lod eus ar re a gemero perzh. Met ne vo ket tud o komz eus un tu ha tud all o selaou ouzh an tu all. Eskemm a vo ar pal ha pep hini a c’hello kemer perzh. Gant Tugdual Kerluer, kazetenner Radio Kreiz Breizh, e vo lusket an eskemmoù. E galleg hag e yezh ar sinoù e vint jubennet war ar prim. Da gentañ e c’hello pep hini kinnig buan-ha-buan e stourm. Goude-se vo goulennet digant ar berzhidi e peseurt mod e vez graet gant ar brezhoneg en o stourmoù. Daoust hag anat eo dezho? Penaos bezañ komprenet gant ar muiañ niver? Daoust hag eo ret displegañ bep tro d’o c’heneiled? Penaos e kendrec’hont anezho eo reizh ober gant ar brezhoneg?

“Gardarem lo Larzac!”

Hiziv an deiz eo emskiant an nevezvrezhonegerien eus pouez liesseurted ar yezhoù. Komprenet e vez mat ganto ivez eo ret doujañ d’an natur ha mirout pinvidigezh an ekosistem. Met n’eo ket ken anat atav d’an dud a vez o vanifestiñ a-enep aerborzh Kernitron-al-Lann da skouer, eo talvoudus ar brezhoneg. Penaos bezañ gouest da gendrec’hiñ ar muiañ niver neuze eo ret ober traoù evit saveteiñ hor yezh, ma n’omp ket gouest da reiñ an dra-se da gompren d’ar re a zo kizidikaet d’an ekologiezh dija? Marteze e c’hell ar vrezhonegerien tennañ gounit eus an emskiant hag eus ar stourmoù ekologel ha sokial evit kas ar brezhoneg war raok, dre an doare da welet ar bed hag ivez dre an doareoù da stourm. Eus un tu all n’eo ket dibosupl e c’hellfe ar yezhoù lec’hel degas un nerzh ouzhpenn da seurt stourmoù. Ul lugan okitanek a zeu deomp da skouer pe soñjer en unan eus stourmoù brudetañ an dekvloazioù tremenet!