Bep bloaz e vez roet Prizioù dazont ar brezhoneg d’ar re o deus graet traoù a-bouez evit ar yezh e 7 rummad gant Frañs 3 Breizh hag Ofis Publik ar Brezhoneg.

Lorc’h zo ennomp d’ho kelaouiñ eo aet priz kentañ rummad ar c’hevredigezhioù gant hor raktres Stal.bzh !

Trugarekaat a reomp hon holl gevelerien⋅ezed hag ar re  a implij al lec’hienn hag arload.

Abaoe daou vloaz e labouromp war ar raktres-se gant nerzh-kalon ha laouen omp o welet ez eus muioc’h-mui a dud a vicher o lakaat o anv ha muioc’h-mui a dud oc’h ober gant ar benveg !

Gourc’hemennoù d’al loreidi all a-bep seurt rummad. Gwelet ‘vez mat dre roll loreidi ar Prizioù 2020 pebezh startijenn ‘zo gant ar brezhonegerezed hag ar vrezhonegerien.

Domaj e kavomp memestra ne vije ket bet eus lid ar prizioù, un darvoud pouezus hag alc’hwezus, e brezhoneg penn-da-benn (pe dost). Ral eo bet ar programmoù e brezhoneg er mizioù paseet, gant ar spi e vo muioc’h-muiañ a vrezhoneg a-benn nebeut war Frañs 3 hag er skinwel dre vras.