Piv omp ni ?

Piv omp ni ?

Merc’hed ha paotred-ar-brezhoneg

ul lodenn eus ar skipailh

Ul lodenn eus ar skipailh. Foto S. Poulichet

Tomm eo hor c’halon ouzh ar brezhoneg ha c’hoant hon eus da implij hor yezh bemdez.

Labourat a reomp war raktresoù liesseurt evit kas ar yezh er vuhez pemdeziek : er bed niverel, en ekonomiezh hag er stalioù, er sonerezh a-vremañ hag en darvoudoù.

E-touez ar raktresoù brasañ douget ganeomp ho peus marteze dija klevet trouz eus :

  • Stal.bzh : al lec’hienn evit kavout ar re a vicher a skoazell ar brezhoneg pe a labour e brezhoneg
  • An Taol-Lañs : al leurenn-lañs nemeti evit ar sonerezh a-vremañ kanet e brezhoneg
  • Ar festival GBB : lidet a bep eil bloaz evit enori ar brezhoneg, ar brezhonegerezed, ar vrezhonegerien hag ar re a zo tomm o c’halon ouzh yezh ar vro
  • Boutik.mignoned.bzh : hor boutik kevredigezhel evit kinnig produioù a vrezhoneka ho puhez en ur skoazell kevredigezhioù

Kinnig a reomp pourchasoù treiñ, abadennoù e brezhoneg, tañva d’ar brezhoneg war ar prim… evit kas ar brezhoneg e pep lec’h, en un arc’hantaouin ar gevredigezh. Digor bras omp d’ar c’hinnigoù kevelerezh.

Evit gouzout hiroc’h e c’helloc’h lenn danevell obererezh diwezhañ ar gevredigezh.

Deuit davedomp !

Degemeret e vioc’h gant plijadur m’ho peus c’hoant da vont davedomp ! Statudoù ar gevredigezh a c’helloc’h kavout amañ. Ha war Helloasso e c’helloc’h emezelañ d’ar gevredigezh evit 5€/bloaz.

Berr an amzer ganeoc’h ?

C’hoant ho peus skoazell ac’hanomp met ne c’helloc’h ket kemer perzh e buhez ar gevredigezh ? Galloud a reoc’h :

  • ober ur prof deomp war helloasso pe dre chekenn pe tennadenn SEPA (tu zo da lakaat ho tailhoù da zigreskiñ eus 66 % eus ar prof)
  • mont da weladenniñ boutik.mignoned.bzh
  • brudañ “Stal.bzh” ha “GBB & An Taol-Lañs” : komzit eus ar raktresoù, heuliit ac’hanomp war ar rouedadoù sokial !